روانگەیگ ئابووری: عراق هەوەجە وە 10 هەزار مەکتەو دیرێد ئەرا بنبڕکردن قەرەباڵغی پۆلەیل

شەفەق نیوز - بەغداد روانگەی "ئیکۆ عراق" تایبەتمەن وە کاروبار ئابووری، ئمڕوو یەکشەممە، خەوەردا کە عراق هەوەجە وە زیاتر لە 10 هەزار مەکتەو نوو دیرێد ئەرا چارەسەرکردن قەرەباڵغی لەناو پۆلەیل و وەدیهاوردن ژینگەیگ فێرکاری خاستر، دياری کرد کە وەردەوامبۊن بویین نزیکەی 200 مەکتەو خەڕگین کە خوەنەوارەیل چنە ناویان. روانگەگە، لە بەیاننامەیگ کە رەسیە ئاژانس شەفەق نیوز وتیش کە "سمارەی ئەو مەکتەوەیلە کە خوەنەوارەیل لە عراق چنە ناویان لە 40 هەزار مەکتەو رەد کەێد، باوجی ئی شمارە هێمان بەس نییە ئەرا وەجیهاوردن هەوەجەی راسگانی".