دڵنگ کوردی لە بەیرووت ئامادە بوود.. هونەرمەنەیل خانەقین پەیام وەیەکەوژیان وەرەو "سیمپۆزیۆم ئەرز 2" هەڵگرن (وینە)

شەفەق نیوز- بەیرووت بەیرووت پایتەخت لوبنان، ئمڕوو شەممە، میوانداری چالاکییەیل "سیمپۆزیۆم ئەرز 2"، وە بەشداری نزیکەی 35 هونەرمەن لە لوبنان و عراق و هەرێم کوردستان کرد، لە چالاکییگ کە هونەر شیوەکاری وەگەرد پەیامەیل دووسایەتی و وەیەکەوژیان و ئاشتی لەناوەین نەتەوە جیاجیایەیل گردەو کرد. سیمپۆزیۆمەگە وە چەودیاری وەزارەت روشنهویری لوبنانی و یەکێتی شارەوانییەیل خوەرئاوای بان و شەحار، و رێکخستن کۆڕبەن هونەر شیوەکاری عەرەبی ساز کریا، وە هاوکاری وەگەرد شارەوانی سووق غەرب و پشتگیری کۆمەڵەی خانمان لە سووق غەرب، لە وەختیگ چالاکییەیلی تا هەشتەم لە ئەیلول/سێپتێمبەر وەردەوام بوود.