وسیان سیستەم ئەلکترۆنی لە پۆلیس هاتوچوی تاجیات مامەلەی هاوڵاتیەیل هەفتەیگ دویاخەێد

شەفەق نیوز ـ بەغدا سەرچەوەیگ ئاگادار، ئمڕوو سێشەممە، ئاشکراکرد سیستەم ئەلکترۆنی لە هاتوچوی تاجیات لە بەغدا ئەراماوەی هەفتەیگە وسیاس، وە مدوو رێکارەیل نووکردن سیستەم ئەلکترۆنیەگە، کە بویەسە دیرکەفتن مامەلەی هاوڵاتیەیل و کومەوبوینی وەبان یەکتر. سەرچەوەگە وە ئاژانس شەفەق نیوز وت، وسیان سیستەمەگە بویەسە مدوو گیچەڵ لە وەڕیچگن مامەڵەی ناو شوینەگە دیر کەفتن مامەڵەی هاوڵاتیەیل، وەگەرد داواکاری فرەیگ، وتیش هاوڵاتیەیل داواکەن وە زویترین وەخت چارەسەر گیچەڵەگە بکریەێد و دوارە سیستەمەگە بخریەێدە وەردەس.